ដោយ៖ ណាត សុភាព
ថ្ងៃចន្ទ ទី6 ខែមករា ឆ្នាំ2014http://vodhotnews.com
ថា្នក់ដឹកនាំគណបក្សសង្គ្រោះជាតិធ្វើពិធីបង្សុកូលជូនកម្មករដែលបាត់បង់ជីវិត ក្នុងហេតុការណ៍ប៉ះទង្គិចនៅផ្លូវវេងស្រេង (រូបភាពដោយ ណាត សុភាព)
អនុប្រធានគណបក្សសង្គ្រោះជាតិ (CNRP) លោក កឹម សុខា ឲ្យដឹងនៅថ្ងៃចន្ទនេះថា លោក និងលោក សម រង្ស៊ី មិនព្រួយបារម្ភពីសុវត្ថភាពផ្ទាល់ខ្លួនទេ ខណៈសមត្ថកិច្ចចាប់ខ្លួនអ្នកតវ៉ាជាបន្តបន្ទាប់ ដូចជាការ ចាប់ខ្លួនស្ត្រីអ្នកបឹងកក់៥នាក់ នៅមុខស្ថានទូតបារាំងប្រចាំកម្ពុជាជាដើម។
លោក កឹម សុខា ថ្លែងបែបនេះទៅកាន់អ្នកសារព័ត៌មាន នៅក្នុងពិធីបង្សុកូល នៅទីស្នាក់ការគណបក្សសង្គ្រោះជាតិ ចាក់អង្រែលើ រាជធានីភ្នំពេញ ជូនដល់កម្មករ៥នាក់ ដែលបាត់បង់ជីវិតអំទ្បុងការបង្ក្រាបរបស់សមត្ថកិច្ច នៅផ្លូវវេងស្រេង កាលពីថ្ងៃទី៣ ខែមករា។ លោក កឹម សុខា បន្តថា លោកក៏គ្មានគម្រោងចាក់ចេញទៅក្រៅប្រទេសដែរ។
លោក គិតថា បើរាជរដ្ឋាភិបាល នៅតែបន្តប្រើកងប្រដាប់អាវុធបង្ក្រាប និងគំរាមចាប់ខ្លួនប្រជាពលរដ្ឋ ដែលទាមទារសិទ្ធិសេរីភាពនោះ សហគមន៍អន្តរជាតិ នឹងដាក់សម្ពាធមកលើរាជរដ្ឋាភិបាលឲ្យបញ្ឈប់ទង្វើនេះ។
លោក សម រង្ស៊ី និងលោក កឹម សុខា ត្រូវបានអយ្យការអមសាលាដំបូងរាជធានីភ្នំពេញ កោះហៅឲ្យចូលខ្លួនបំភ្លឺ នៅថ្ងៃទី១៤ ខែមករា ករណីការញុះញង់ឲ្យប្រព្រឹត្តបទឧក្រិដ្ឋ ឬអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម៕
សូមសរសេរមកកាន់លោក ណាត សុភាព តាមរយៈ sopheap@vodhotnews.com