ដោយ ទីន ហ្សាការីយ៉ា2014-01-07
RFA
ស្ដាប់ ឬ ទាញយកសំឡេង
ប្រធាននិងអនុប្រធានគណបក្សសង្គ្រោះជាតិ លោក សម រង្ស៊ី និងលោក កឹម សុខា ថ្លែងក្នុងសន្និសីទកាសែតនាទីស្នាក់ការបក្សសង្កាត់ចាក់អង្រែលើ កាលពីព្រឹកថ្ងៃទី៧ មករា ឆ្នាំ២០១៤។ RFA/Tin Zakariya
មេដឹកនាំគណបក្សសង្គ្រោះជាតិ បានឲ្យដឹងថា គណបក្សសង្គ្រោះជាតិ បានផ្ទេរសិទ្ធិឲ្យមេធាវីអន្តរជាតិ ដើម្បីធ្វើការស៊ើបអង្កេតលើករណីកម្លាំងរបស់រដ្ឋាភិបាលបាញ់ប្រហារទៅលើកម្មករ ក្នុងប្រតិបត្តិការបង្ក្រាបកម្មករធ្វើបាតុកម្មអហិង្សានោះ។
ការលើកឡើងដូច្នេះនៅក្នុងសន្និសីទសារព័ត៌មាននៅស្នាក់ការគណបក្សសង្គ្រោះជាតិ ចាក់អង្រែលើ ថ្ងៃទី៧ ខែមករា ឆ្នាំ២០១៤។
អនុប្រធានគណបក្សសង្គ្រោះជាតិ លោក កឹម សុខា មានប្រសាសន៍ថា ប្រសិនបើក្រុមមេធាវីអន្តរជាតិរកឃើញថា កម្លាំងប្រដាប់អាវុធរដ្ឋាភិបាលប្រើអំពើហិង្សាខុសច្បាប់ ជាការវាយប្រហារដោយរង្គាល និងមានលក្ខណៈជាប្រព័ន្ធនោះ មានន័យថា ជាឧក្រិដ្ឋកម្មប្រឆាំងមនុស្សជាតិ ហើយគណបក្សសង្គ្រោះជាតិ នឹងដាក់ពាក្យបណ្ដឹងទៅតុលាការព្រហ្មទណ្ឌអន្តរជាតិ អាយ.ស៊ី.ស៊ី (ICC) នៅទីក្រុងឡាអេ ប្រទេសហុឡង់ដ៍ ភ្លាម។
«សំឡេង»
តុលាការព្រហ្មទណ្ឌអន្តរជាតិ ជាតុលាការឯករាជ្យមិននៅក្រោមអង្គការសហប្រជាជាតិ ទេ។ តុលាការព្រហ្មទណ្ឌអន្តរជាតិ បង្កើតឡើងក្រោមលក្ខន្តិកៈមួយដែលគេបានព្រមព្រៀងគ្នានៅទីក្រុងរ៉ូម ប្រទេសអ៊ីតាលី។ តុលាការនេះចាត់ការតែរឿងក្តីព្រហ្មទណ្ឌកម្រិតធ្ងន់ណាដែលម្ចាស់ប្រទេសព្រងើយកន្តើយមិនដោះស្រាយ ឬក៏រដ្ឋាភិបាលនៃប្រទេសនោះចាត់ការដោះស្រាយដែរ តែគ្រាន់តែប្រើប្រាស់ប្រព័ន្ធតុលាការដែលនៅក្រោមសម្ពាធរដ្ឋាភិបាលណានោះ ដើម្បីជួយការពារឧក្រិដ្ឋជន មិនអោយទទួលខុសត្រូវចំពោះអំពើឧក្រិដ្ឋដែលជននោះបានប្រព្រឹត្ត។
ឆ្លើយតបនឹងបញ្ហានេះ មន្ត្រីនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ការពឹងពាក់មេធាវីបរទេសណាមួយនោះ គឺជាសិទ្ធិរបស់គណបក្សសង្គ្រោះជាតិ។ តែលោកបញ្ជាក់ថា បញ្ហានេះរដ្ឋាភិបាលក៏បានបង្កើតគណៈកម្មការស៊ើបអង្កេត ដើម្បីរកយុត្តិធម៌ជូនអ្នកដែលស្លាប់ទៅដែរ។
«សំឡេង»
ទោះជាយ៉ាងនេះក្ដី គណបក្សសង្គ្រោះជាតិ និងអង្គការសិទ្ធិមនុស្សមួយចំនួន បានលើកឡើងថា ពួកគេមិនមានជំនឿលើរដ្ឋាភិបាលក្នុងការបង្កើតគណៈកម្មការស៊ើបអង្កេតចំពោះការប្រើអំពើហិង្សាលើកម្មករទេ ពីព្រោះថា ជាបទពិសោធន៍ ការបាញ់សម្លាប់កម្មករសំណង់នៅស្ពានអាកាសក្បាលថ្នល់ និងករណីបាញ់ស្លាប់ស្ត្រីលក់បាយនៅស្ទឹងមានជ័យ មកទល់ពេលនេះរដ្ឋាភិបាលមិនមានឆន្ទៈក្នុងការរកឃាតកពិតនោះទេ។
បន្ថែមលើនេះទៀត ប្រធានគណបក្សសង្គ្រោះជាតិ លោក សម រង្ស៊ី មានប្រសាសន៍ថា គណបក្សសង្គ្រោះជាតិ នៅតែរក្សាជំហរទាមទារដដែល គឺការទាមទារឲ្យមានការបោះឆ្នោតឡើងវិញនៅមុនអាណត្តិ។ លោកបញ្ជាក់ថា ទោះបីជាគណបក្សប្រជាជនកម្ពុជា ដឹកនាំដោយ លោក ហ៊ុន សែន បានប្រើយុទ្ធសាស្ត្របាញ់សម្លាប់យ៉ាងណាក៏ដោយ ក៏គណបក្សសង្គ្រោះជាតិ នៅតែរក្សាជំហរដដែល។
«សំឡេង»
អង្គការសិទ្ធិមនុស្សជាតិ អន្តរជាតិ ក្រសួងការបរទេសសហរដ្ឋអាមេរិក និងបណ្ដាញអង្គការសហប្រជាជាតិ ប្រចាំប្រទេសកម្ពុជា រួមនឹងអ្នករាយការណ៍ពិសេសរបស់អង្គការសហប្រជាជាតិ ស្ដីពីស្ថានភាពសិទ្ធិមនុស្សនៅកម្ពុជា កាលពីថ្ងៃសុក្រ ទី៣ មករា បានថ្កោលទោសការប្រើប្រាស់គ្រាប់កាំភ្លើងពិតរបស់កងរាជអាវុធហត្ថ បាញ់ទៅលើក្រុមកម្មករ បណ្ដាលឲ្យកម្មករចំនួន ៤ស្លាប់ និង ៣៧នាក់ផ្សេងទៀតរងរបួស។ អង្គការសហប្រជាជាតិ ស្នើឲ្យសមត្ថកិច្ចរដ្ឋាភិបាល បញ្ឈប់ការប្រើប្រាស់គ្រាប់កាំភ្លើងពិតបង្ក្រាបបាតុកម្ម៕